⌂Ana Sayfa ☾Günlük Ayet ☾Cüzler
52
SURE

Tur Suresi

Ələddin Sultanov •
← Önceki Sure Sonraki Sure →
⌄
⌄
00:00 / 00:00
1
And olsun dağa! (Təfsirlərdə qeyd olunduğuna görə, bu dağ Həzrət Musanın Allahla danışdığı Mədyəndəki dağdır.)
2
And olsun sətir-sətir yazılmış kitaba -
3
Sərilmiş incə dəriyə (yazılmış kitaba)!
4
And olsun Beyti-məmura! (“Beyti-məmur” ifadəsi “Kəbə”, yaxud “səmada mələklərin təvaf etdiyi bir məqam” olaraq təfsir edilmişdir.)
5
And olsun yüksəldilmiş tavana (göyə)!
6
And olsun dolmuş (alovlanan) dənizə!
7
Rəbbinin əzabı mütləq gerçəkləşəcəkdir.
8
Onu dəf edə biləcək heç bir şey yoxdur.
9
O gün göy şiddətlə çalxalanacaqdır.
10
Dağlar hərəkət edəcəkdir.
11
O gün (haqqı) yalanlayanların vay halına!
12
O kəslər ki, bataqlıqda (batil içində) əylənirdilər.
13
O gün onlar zorla cəhənnəm oduna atılacaqlar.
14
(Onlara belə deyiləcək:) “Sizin yalan saydığınız cəhənnəm budur!
15
Bu sehrdir, yoxsa siz görmürsünüz?!
16
Girin ora! (Əzaba) dözsəniz də, dözməsəniz də sizin üçün birdir. Siz yalnız etdiklərinizə görə cəzalandırılırsınız”.
17
Şübhəsiz ki, müttəqilər cənnət bağlarında və nemətlər içində olacaqlar.
18
Rəbbinin onlara verdiyi nemətlərlə səfa sürəcəklər. Rəbbi onları cəhənnəm əzabından qorumuşdur.
19
(Onlara belə deyiləcək:) “Etdiyiniz (gözəl) əməllərə görə nuşcanlıqla yeyin, için!
20
Cərgə-cərgə düzülmüş taxtlara söykənərək!” Biz onları irigözlü hurilərlə evləndirəcəyik.
21
Möminlərin özlərindən sonra iman gətirən nəsillərini də onların yanına (cənnətə) qoyacağıq. Onların əməllərindən heç bir şeyi əskiltməyəcəyik. Hər kəs qazandığının (öz əməlinin) girovudur.
22
Onlara arzuladıqları meyvə və ətdən bol-bol verəcəyik.
23
Onlar orada qədəh-qədəhə vuracaqlar. Orada (içki səbəbilə) nə boşboğazlıq, nə də günaha girmə vardır.
24
Qorunub saxlanılan inci kimi gənc (xidmətçi) oğlanlar onların ətrafında dolanacaqlar.
25
Onlar bir-birinə üz tutub hal-əhval tutacaqlar.
26
Belə deyəcəklər: “Biz daha əvvəl ailəmizin yanında (Allahın əzabından) qorxurduq.
27
Ancaq Allah bizə lütf etdi və bizi qızmar külək əzabından qorudu.
28
Şübhəsiz ki, biz daha əvvəl də Ona dua edirdik. Həqiqətən, Allah xeyirxahdır, mərhəmətlidir”.
29
Ona görə də sən öyüd-nəsihət ver! Rəbbinin neməti sayəsində sən nə kahinsən, nə də məcnun!
30
Yoxsa onlar: “O şairdir. Biz onun zəmanənin fəlakətlərinə düçar olmasını (ölməsini) gözləyirik”, - deyirlər?!
31
De ki: “Gözləyin! Mən də sizinlə birlikdə gözləyirəm”.
32
Yoxsa ağıllarımı bunu onlara əmr edir, yaxud onlar azğın bir qövmdür?!
33
Yoxsa onlar: “Onu (Quranı) özü uydurmuşdur!” - deyirlər?! Xeyr! Onlar inanmırlar.
34
Əgər doğru deyirlərsə, onda Qurana bənzər bir söz gətirsinlər.
35
Yoxsa onlar heç bir yaradan olmadan yarandılar, yaxud özləri yaradandırlar?!
36
Yoxsa göyləri və yeri onlarmı yaratdılar?! Xeyr! onlar yəqinliklə inanmırlar.
37
Yoxsa Rəbbinin xəzinələri onların yanındadır, yaxud hökmranlıq edən onlardır?!
38
Yoxsa onların üstünə çıxıb (qeybi) dinlədikləri nərdivanlarımı var?! Elə isə onların dinləyəni açıq-aydın bir dəlil gətirsin.
39
Yoxsa qızlar Onun (Allahın), oğlanlar sizindirmi?!
40
Yoxsa sən onlardan bir ücrət tələb edirsən və buna görə onlar ağır bir yük (borc) altında qalıblar?!
41
Yoxsa qeyb xəbərləri onların yanında olub bunu onlarmı yazırlar?!
42
Yoxsa onlar bir tələ qurmaq istəyirlər?! Tələyə düşəcək olanlar məhz kafirlərdir.
43
Yoxsa onların Allahdan başqa bir ilahımı var?! Allah onların qoşduqları şəriklərdən uzaqdır!
44
Əgər göydən düşən bir parça (əzab) görsələr: “Bulud topasıdır”, - deyərlər.
45
Ona görə də sarsılacaqları günlərinə qovuşana qədər onları (öz hallarına) tərk et! (Sarsılacaqları gün ölüm, yaxud birinci Sura üfürüləcək gündür.)
46
Onların hiylələri o gün onlara heç bir fayda verməyəcək və onlara heç bir yardım olunmayacaqdır.
47
Şübhəsiz ki, zalımlar üçün ondan başqa bir əzab da vardır. Lakin onların çoxu bunu bilmir. (Bu əzab dünya həyatında, yaxud qəbir həyatında görəcəkləri əzabdır. Çünki onlar dünya həyatında qıtlıq, müharibə və məğlubiyyətlərlə əzabı dadmışdılar.)
48
Elə isə sən Rəbbinin hökmü gələnə qədər səbirli ol! Şübhəsiz ki, sən Bizim gözümüzün önündəsən (nəzarətimizdəsən). Ayağa (namaza) durduğun zaman Rəbbini həmd ilə təsbeh et!
49
Gecənin bir vaxtında və ulduzlar batandan sonra da Onu təsbeh et!